Ipigrekomendar kan House quad committee na sampahan nin kasong kriminal si dating Presidente Rodrigo Duterte asin an dating mga aides kaini na sinda sina Senador Ronald “Bato” dela Rosa asin Christopher “Bong” Go.
Ini may kinaaraman sa pagkakasangkot sa extrajudicial killings sa nakaaging administrasyon.
Sa progress report kan Quad Committee, binasa ni quad committee chairperson Surigao Del Norte Rep. Robert Ace Barbers an malinaw na pagbalgar ninda asin kaipuhan sinda na sampahan nin kaso sa irarom kan Section 6 o other crimes against humanity kan Republic Act 9851 o an Philippine Act on Crimes Against International Humanitarian Law, Genocide and Other Crimes Against Humanity.
Kaubay man sa ipigrekomendang sampahan nin kaso sinda dating PNP chief Oscar Albayalde, Debold Sinas, dating police officers Royina Garma, Edilberto Leonardo asin Palace aide Herminia “Muking” Espino.
Dugang pa ni Barbers na kan Nobyembre 13 kan ipaapod an dating presidente kinumpirmar kaini an pamamayagpag kan reward system na target an mga drug personalities gamit an natadang campaign funds para magamit sa reward system.
Kinumpirmar man ni Duterte kan ini ipinaapod sa senado na ipig-engganyar kaini an mga kapulisan na piriton na manlaban an mga suspetsado na nadadakop para patunayan an nasambit na paggadan.
Mientrastanto, isinumiter na kan House of Representatives an findings asin recommendations kan Quad Comm sa mga ahensiya para sa magkakanigong aksyon.
