LEGAZPI CITY—Arestado an sarong High Value Target Individual sa ikinundusir na buy bust operation sa Brgy. 24-Rizal, Legazpi City.
Segun ki Legazpi City Police Station, Public Information Officer, Police Executive Master Sergeant Carlos Paña, sa intrevista kan Bombo Radyo Legazpi, binisto an suspek na si alyas “Kikoy”, 26-anyos, warang agom, sarong disbursing officer sa sarong ahensya kan gobyerno, asin residente kan Barangay 27-Victory Village South kan naunambitang ciudad.
Sinabi ni Paña na nakipaghilingan an nagpanggap na pulis sa suspek nganing magbakal nin pigtutubudang shabu.
Sa pagresibi kan suspek nin kwarta na nagkakantidad nin P17,000 kaiba na an budol money karibay an limang gramong shabu na nagkakantidad sa street value na P34,000.
Narekober man sa ikinundusir na body search an sarong built bag na may laog nin sarong paketeng igwang apat na gramong pigtutubudang shabu na nagkakantidad man nin P27,000.
Sumatotal nakumpiskar sa suspek an labi sa siyam gramong pigtutubudang shabu na may kantidad P61,000.
Mahahampang an suspek sa kasong pagbalgar sa Republic Act 9165 o an Comprehensive Dangerous Drugs Act of 2002.
