LEGAZPI CITY – Napasakamot na kan Police Regional Office 5 an haros gabos na nasa top 10 most wanted sa rehiyon bicol na nahahampang sa manlain-laing kaso arug kan attempted murder, murder, rape, acts of lasciviousness asin iba pa.
Segun ki PRO5 Regional Director Police Brigadier General Andre Dizon sa intrevista kan Bombo Radyo Legazpi na dakulang tabang sa trayumpo an saindang intelligence operation siring man an eksakto asin tamang impormasyon na ipigtao kan mga informant nganing madakop an mga ini.
Padagos man an pagpapagayon kan saindang serbisyo bako sana sa irarom kan bagong PNP chief kundi an nganing maipamate sa mga bicolano na dae sinda pigpapabayaan kan mga kapulisan.
Haros bilog na bulan suboot nin hunyo an labi na sa 50 most wanted an saindang naarestar kabale an mga may warrant of arrest hale sa korte, miembro kan communist terrorist group asin iba pa.
Pagdoon kan opisyal na madugang ini sa pagpapaotob kan pazy orden sa rehiyon huli ta naipakulong na ninda an mga tawong nagtatago asin pighahanap kan ley.
Dakulang bagay man an pagigin rigmat kan publiko huli ta aram ninda kun siisay sa saindang pagrugaring an mga may kahina-hinalang hiro asin tulos ining nagkokoordinar sa saindang mga hepatura.
Pangapodan ni Dizon sa mga kapulisan asin ibang pang law enforcement agency na magtarabangan sa pagtatao nin serbisyo sa namamanwaan asin nganing madakop an mga indibidwal na may pagkakasala, nagtatago asin nagbayolar sa ley.
