LEGAZPI CITY- Maski pa dae napagbigyan sa kahagadan na bako na hali sa politika an idesignar sa Department of Education, nagpahayag man liwat nin kahandaan an grupo nin mga pararukdo na suportaran si Senator Sonny Angara.
Segun ki Teachers’ Dignity Coalition Chairman Benjo Basas sa intrevista kan Bombo Radyo Legazpi na ipigrerespeto ninda an nagin desisyon ni Presidente Ferdinand Marcos Jr.
Sinabi kan grupo na dakulang organisasyon an Department of Education asin iba ini sa mga nakasanayan na responsibilidad ni Angara bilang senador kaya kinakaipuhan suboot na matutukan an magigin mandato.
Katakod kaini, hagad ngunyan kan grupo na makaolay an incoming DepEd Secretary ngani na magkaigwa nin dayalogo sa nagkapirang mga isyu sa sektor.
Paliwanag ni Basas na mawot ninda na matutukan ni Senator Angara an mga polisiya na makakatabang para sa mga paratukdo siring na sana kan dae pa naipapaotob na paghahali kan administrative task asin pagkakaigwa nin overtime pay.
Segun sa opisyal, igwa na nin mga polisiya alagad kulang pa sa implementasyon kaya hagad kaini na personal na makaolay si incoming Department of Education secretary Angara.
