LEGAZPI CITY—Kinondena kan Alliance of Concerned Teachers an nangyaring pangmomolestiya suboot kan sarong paratukdo asin pagpapakaon nin ipis sa estudyante sa sarong pampublikong eskwelahan sa Tondo, Manila.
Segun ki Alliance of Concerned Teachers Chairperson Ruby Ana Bernardo, sa intrevista kan Bombo Radyo Legazpi, dismayado an saindang grupo huli sa imbes na an eskwelahan an pinakaligtas na lugar para sa mga estudyante an iyo pa an pinuonan nin siring na kaharasan.
Tinawan-doon kaini na dae ninda pigkunsinti an ano mang klase nin pang-aabuso asin dapat sanang mapanimbag an mga personang imbuelto digdi.
Dugang ni Bernardo na padagos nindang pigkukuwa an komunikasyon kan nasabing indibidwal nganing mahiling an due process huli sa mawot man nindang pangatamanan an kredibilidad kan mga public school teachers sa nacion.
Posible suboot na mahampang an nasambitang paratukdo sa kasong pagbalgar sa Republic Act 7610 o “Special Protection of Children Against Abuse, Exploitation, and Discrimination Act,” magin sa Acts of Lasciviousness.
Mensahe man ni Bernardo sa mga kapwa paratukdo na magin sarong leksyon an nasabing insidente asin dapat na pangatamanan an saindang kredibilidad asin dangal sa laog nin eskwelahan asin patunayan na sinda an panduwang magurang kan mga estudyante.
