LEGAZPI CITY – Suportado kan grupo nin mga paratukdo an ginibong lakdang kan Department of Education na maghire nin maabot sa 20,000 na mga paratukdo.
Segun ki Alliance of Concerned Teachers Chairperson Vladimir Quetua sa intrevista kan Bombo Radyo Legazpi na suportado ninda an magayon na development huli sa kakulangan nin numero kan mga paratukdo kompara sa nagdadakol na numero kan mga estudyante.
Alagad pigkakahandalan niya man na pwedesir na abuton pa nin pirang bulan antes makalaog an mga ini sa mga pampublikong eskwelahan.
Dapat suboot na ideploy an mga ini sa mga eskwelahan na harararyo, nagkukulang asin labing nangangaipuhan nin mga paratukdo nganing ma-maximize an mga ini.
Naglalaom an opisyal na kasunod na kaining madudugangan an mga classroom nganing mabawasan na an mga eskwelahan na nagkokondusir nin saturday classes.
Suhestyon niya man na dapat sunudon an international standards na kun sain an sarong paratukdo an kakaputan an 35 estudyante nganing malikayan an suksukan sa mga classroom.
Sa saiyang konsultasyon sa nagkapirang kaguruan sa enterong nacion, nagtetenir na problema an kadakol na workload, kakulangan sa learning materials, asin iba pang kagamitan sa mga eskwelahan.
Pighayag pa ni Quetua na nakatalaan mang sindang makipag-olay sa manhamiento kan Department of Education nganing itukar an mapadapit sa budget kan sektor kan edukasyon asin an pagtatao kan mga benipisyo kan mga paratukdo.
