LEGAZPI CITY-Uminabot na sa 112.7 bilyon US Dollars an Gross International Reserves (GIR) kan Pilipinas poon Pebrero 2026, basado sa pangenot na datos kan Bangko Sentral ng Pilipinas (BSP).
An kantidad na ini nagtataong kumpiyansa sa kakayanan kan nacion na hampangon an mga angat sa pankinabang ekonomiya.
Segun sa ahensya na an reserbang ini katumbas kan 7.5 na bulan nin importasyon kan kalakal, serbisyo asin primary income, na mas halangkaw pa kaysa sa internasyonal na regulasyon na tulong bulan sana.
Afuera digdi, sakop kaini an 4.2 na beses kan panandaliang utang sa luwas kan nacion basado sa residual
maturity.
Pigbibilog ini kan Gross International Reserves kan foreign-denominated securities, foreign exchange, ginto, asin iba pang reserve assets.
An paglangkaw kan kantidad kan ginto sa pankinabang merkado, saro sa mga pangenot na salik nag-ambag sa paglobo kan reserba.
Poon Enero 2026 na nasa dai mababa 107.4 bilyon US Dollars ini asin naglangkaw nin labi sa 5 bilyon US Dollars sa laog nin sarong bulan.
Pigkokonsiderar kan mga ekonomista na importante an record na lebel kan GIR huli ta nagtatao ini nin dakulang kakayahan sa BSP na idepensa an piso laban sa depreciation, masierto an pagbayad kan utang sa luwas, asin mapakusog an kumpiyansa kan mga investor.
Sa hampang kan dai nagbabago-bago na interest rates asin geopolitical tensions sa pankinabang merkado, an halangkaw na reserba sarong malinaw na indikasyon kan mas makusog na posisyon sa luwas kan Pilipinas.
