Nag-atendir si dating Senate finance committee chairperson senador Grace Poe sa hearing kan Independent Commission for Infrastructure (ICI) nganing ipaliwanag an proseso kan pagbilog kan national budget.
Sa hampang kan komisyon, pinahimutikan ni Poe an pagkaimbwelto sa inaapod na “small committees” kan bicameral conference committee kun saen suboot nangyari an mga kuestionableng paglaog o pagdagdag sa budget.
Sinabi niya na dai siya nag-atendir nin arin man na closed-door meeting o sadit na grupo na may mga representante gikan sa Kamara.
Pig-eksplikar man ni Poe na inaprobaran an gabos na amendment sa bicameral hearing asin ipinadara sa Department of Budget and Management (DBM).
Dai pa sana nahahaloy nag-atendir sa imbestigasyon si Senate President Vicente “Tito” Sotto III asin si Senador Panfilo Lacson, na parehong nanindugan na illegal an mga insertions na isiningit pagkatapos kan bicameral hearings.
Padagos an imbestigasyon kan ICI sa mga suboot iregularidad sa alokasyon kan pondo para sa imprastraktura.
