LEGAZPI CITY – Mareresibe na kan mga empleyado kan gobierno an “Christmas bonus”, segun sa abiso kan Department of Budget and Management (DBM) Regional Office 5.
Sinabi ni DBM Bicol Director Renato de Vera sa intrevista kan Bombo Radyo Legazpi, dapat na preparado na an year-end bonus asin cash gift na itatao sa mga empleyado puon Nobyembre 15 na naka-alocar na susog sa General Appropriations Act of 2019.
Sakop kan tax-free yearend bonus an sarong bulan na basic salary asin P5,000-cash gift.
Kwalipikado na makaresibe kaini an mga nag-ookupar kan civilian positions, regular man, contractual o casual in nature, elective, full-time, o part-time sa mga sanga kan ehekutibo, lehislatura, asin judicial branches, constitutional commissions and offices, state universities and colleges, asin government owned and controlled corporations.
Siring man an mga opisyales asin empleyado sa mga various local government units; military asin uniformed personnel sa irarom kan Department of National Defense, Philippine National Police, Philippine Public Safety College, Bureau of Fire Protection, Bureau of Jail Management and Penology, Philippine Coast Guard, asin National Mapping and Resource Information Authority.
Susog sa polisiya kan DBM, kaibanan sa mga kondisyon an pagtetenir sa government service hasta Oktubre 31 kan presenteng taon o dawa nasa kabilugan na apat na bulan sa servicio puon Enero 1 hasta Oktubre 31 asin para sa mga nagretiro antes an Oktubre 31 asin nakapag-render nin kabilugan o aggregate na apat na bulan puon Enero 1 kan taon.
Afuera sa naunambitang bonus segun pa ki de Vera, pighahalat pa kan nagkapirang government employees an Performance-Based Bonus kan 2018 urog na dakol pa suboot an dae pa nakakaresibe kaini.
Pag-eksplikar ni de Vera na sakop nin dakol na condiciones asin ipigsasairarom pa sa evaluation an beneficiario kan PBB antes na maipaluwas asin maresibe kan mga empleyado.
