LEGAZPI CITY – Ipinagsugo na ni Interior and Local Government Secretary Eduardo Año an pagpasiring kan nagkapirang government doctors sa pribadong ospital sa Legazpi City kun sain presenteng naka-confine si Daraga Mayor Carlwyn Baldo.
Ipighayag ini kan sekretaryo kasabay kan isinagibong meeting kaibanan sinda Rodrigo Duterte, Tourism Secretary Bernadette Romulo Puyat asin mag-inang Gertie asin Atty. Justin Batocabe.
Sa intrevista kan Bombo Radyo Legazpi ki Atty. Justin, matuang aki kan ginadan na si Ako Bicol Rep. Rodel Batocabe, piglalaomang maabot sa Albay sa laog nin duwang aldaw an mga doktor na ma-check sa tunay na health condition kan alkalde.
Segun pa ki Atty. Justin, posibleng ilipat sa pampublikong ospital an alkalde urog na nasa irarom ini kan kustodiya kan PNP Criminal Investigation and Detection Group na susog naman sa ley.
En kasong magin marhay na an kamugtakan kan alkalde, ikakaag man ini sa ordinaryong selda kun sain kakahampangon an mga kasong katakod kan illegal possession of firearms, ammunition and explosives.
Magigirumduman na maagahon kan Enero 23 kan darahon sa ospital si Baldo makalihis na magreklamo sa pagkulog kan daghan huli sa pigmamating helang.
Mientras tanto, inasegurar man ni Presidente Duterte an paglaban sa mga magbabalong maghatod nin kariribukan kasabay kan pangapodan sa pamilya na tabangan ining mas mapatalubo an progreso sa Daraga asin rehiyong Bicol.
