LEGAZPI CITY- Namamatian na man suboot sa Kansas City an lipot kan paros na dara kan pig-aapod na Polar Vortex puon Miyerkules nin aga, Enero 30 oras sa US.
Sa report ni Bombo International Correspondent Annabel Wagner sa Bombo Radyo Legazpi, sinabat nin malipot na pagkaaga an KCK kun sain nagbagsak sa -21.6 Degree Celsius an temperatura sa lugar rason tangarig na kanselaron an laog kan nagkapirang eskwelahan asin government offices.
Nagpagirumdom an mga otoridad na dae marhay na magluwas nin harong urog na posibleng magcausa nin frostbite an 10 minuto sana na pagka-expose sa matinding lipot.
Katakod kaini segun ki Wagner, nagkapirang delivery vehicles an pinugulan na munang magbiyahe kaya apektado magin an bulos kan suplay kan goods.
Nagkapirang mga tindahan an naglimitar sa mga ipigpapabakal na produkto huli sa diit na stock tangarig na matawanan man nin oportunidad an iba na makabakal.
Nairehistro man an power outage sa nagkapirang parte kan ciudad kun sain nasa labi 6,000 na households an naapektaran alagad tulos man na na-restore an suplay makalihis an nagkapirang oras.
Sa ibong na lado, padagos man an pagirumdom kan mga otoridad sa pagsunod sa mga abiso tangarig na makaibitar sa aksidente urog na piglalaoman man an maluyang bagsak kan snow.
