Nagpaluwas an Federal Bureau of Investigation (FBI) nin reward money na hasta $25,000 o poco mas o menos P1.4 million karibay kan impormasyon na magtutukdo sa lokasyon kan sarong Pilipinong akusado sa suboot crimes against children.
Segun sa FBI Dallas Field Office, si Austin Jan Sy Yatco an wanted huli sa pagkaka imbwelto sa online exploitation kan mga menor de edad puon kan 2019 hasta 2021.
Pigtataram na parte ini kan sarong network na nagagamit nin gaming asin social media platforms ngani na makipag koordinar sa mga biktima.
Napag-araman na ipinaluwas an federal arrest warrant ni Yatco kan Enero 23, 2026 hali sa United States District Court for the Eastern District of New York.
Kaibanan sa mga pigkakahampang niyang kaso an conspiracy to produce asin conspiracy to receive and distribute child sexual abuse material.
Segun sa imbestigasyon, konektado suboot si Yatco sa sarong online group na pig-aapod na “Greggy’s Cult,” na pigkokonektar sa pag-enganyar asin pagpirit sa mga menor de edad na gumibo nin mga explicit material na pigpaplakop kan grupo.
Sinabi kan mga otoridad na dating nagtetenir si Yatco sa Plano, Texas, alagad pinagtutubudan na nakadulag hali sa Estados Unidos asin posibleng nasa Pilipinas na ngunyan.
Padagos man an pangapudan kan mga otoridad sa publiko na makipagtabangan sa imbestigasyon sa paagi kan pagtatao nin anuman na impormasyon na pwedesir na makatabang sa paghahanap sa akusado.
