LEGAZPI CITY — Nagkokondusir pa nin imbestigasyon an mga otoridad sa sarong estudyante na nadakupan nin shabu sa Albay Provincial Jail.
Nabisto an suspek na si Michael Manrique, 20-anyos na residente kan Barangay Travesia sa banwaan kan Guinobatan, Albay asin Grade 12 senior high school student.
Enot kaini, mabisita sa karsel an suspek alagad kan magsairarom sa inspeksyon kan jail guard an darang grocery, nadiskubre an sarong pakete kan pigtutubudan na shabu na nakalaog sa sarong mamon.
Sa ibong kaini, ipigduon ni Manrique sa eksklusibong intrevista kan Bombo Radyo Legazpi na warang kaaram-aram na igwang darang iligal na droga huli ta sinugo sana suboot kan sarong kabisto.
Pag-istorya pang nakaresibe ini nin apod hali sa kabisto asin nakiolay na magpasiring sa ciudad kan Ligao tangarig na makipaghilingan sa lalaki na may darang grocery na ihahatod sa sarong inmate.
Tulos man na nagsunod huli ta nasusupog na magsayuma urog pang ipighayag kan nagsugo digdi na “importante” an dadarahon na mga pagkaon.
Segun ki Manrique, bisto kaini sa pandok an nagtao kan grocery alagad dae aram an pangaran asin kun sain nakaistar.
Dugang pang dae nag-ako nin anuman na bayad afuera na sana sa itinaong P200 na pamasahe.
Katakod kaini, inabisuhan kan estudyante an publiko na dae basta-basta magtiwala sa maski anong ipapadara maski pa kabisto an nagsugo tangarig dae mapahamak.
Mientras tanto, sa presente padagos pang pig-aaram kan kapulisan an street value kan nakumpiskar na shabu.
