LEGAZPI CITY – Padagos na pigbabantayan ngunyan kan Bureau of Fisheries and Aquatic Resources (BFAR) Bicol an mga pinagkukuwaan nin lamang dagat sa Kabikolan.
Segun ki Nonie Enulva, tagapagtaram kan BFAR- Bicol, ini ngani na ma-monitor kun enkaso magkaigwa nin paglangkaw sa temperatura kan tubig katakod kan summer season huli ta komon na nagbababa man an water level sa mga fishpond o lawa.
Segun sa opisyal, yaon man an posibilidad na magkaigwa nin fishkill tuyong mainit an panahon alagad sa presente nasa normal na kondisyon pa man an mga pigbabantayan kan ahensya na barometro.
Dugang pa ni Enulva, saindang pighihiling kun magkakaigwa nin pagbabago na pwedesir na magkawsa nin mortality sa mga sira na pigkokunsumo kan mga Bicolano.
Mientrastanto, sienerto kaini na sa presente, nasa marhay na kondisyon pa an mga darakulang pinagkukuwaan nin sira siring kan Lake Buhi asin Lake Bato kaya warang dapat na ikahandal an mga namamanwa.
Sa ibong kaini, nagpatanid man an opisyal sa mga residentes kan Milagros, Masbate na ibitaran muna an pagkonsumo nin mga sea shells sa nasambitan na banwaan huli ta nagkaigwa nin red tide kan nakalihis na Marso 15 asin bako pa sierto kun salbado na ining kaunon.
Apwera digdi, nasa normal condition pa man suboot an iba pang mga katubigan maski pa nagpuon nang mamatean sa rehiyon an init kan panahon.
