Pig-enganyar ni Senate President Francis “Chiz” Escudero an Malacañang na magbilog kan pig-aapod na “negative list” o listahan kan mga proyektong pang-imprastruktura na dae dapat pondohan sa irarom kan pambansang badyet para sa 2026.
Ini suboot an dapat tulos na i-veto ni Presidente Ferdinand Marcos Jr. huli ta nagigin rason sana ini kan pag-aaksaya kan pondo na mas kaipuhan sa importanteng programa.
Segun sa senador, mas marhay na magin maagap asin aramon na tulos kun anu-anong proyekto an dae dapat isabay sa budget kaysa halaton pang makalusot an mga kuwestiyonableng proyekto.
Mabaha suboot nin mga warang silbing proyekto kun dae lilinawon kun arin an dapat ipagbawal, asin dapat sanang warang i-alokar na pondo para sa mga proyektong dae man nagtatao nin benepisyo.
Kabale sa mga ipigsuhestyon niyang ibale sa negative list an mga hababang kantidad alagad labing overpriced na kagamitan sa tinampo arug kan reflective studs o “cat’s eyes,” slope protection nets asin mga pintura.
Siring man, dapat mang tanggalon an mga inapod niyang “vanity projects” arug kan waiting sheds, swimming pools, signages asin iba pang bako pangenot na pangangaipuhan na kalimitang magin rason kan pang-aabuso asin pag-aaksaya sa pondo.
Pighihiling man kan Senate President an posibilidad kan pagpapataw nin moratorium sa mga bagong flood control projects kan Department of Public Works and Highways (DPWH) para sa 2026, urog nang nagtetenir na dae pa naipapa-otob an bilyon-bilyong pisong alokasyon sa irarom kan badyet para sa 2025.
Pigtawan doon niya na dapat munang tapuson an mga nakabinbing proyekto asin ayuson an sistema antes ipagpadagos an mga ini, nganing matawan nin tyansa si DPWH Secretary Dizon na ayuson muna an pamamalakad.
Ipigsuhestyon man ni Escudero na ialokar an pondo sa mas importanteng proyekto arug kan waste-to-energy plants, refuse-derived fuel facilities asin iba pang lakdang laban sa basura, baradong agihan nin tubig asin nagbababang kapasidad kan mga salog asin agihan na pangenot na rason kan pagbaha sa Metro Manila asin iba pang ciudad.
