LEGAZPI CITY- Minimal sana an danyos sa sektor kan agrikultura sa banwaan kan Juban huli sa epekto kan abo na ibinagsak kan bulkang Bulusan.
Segun ki Juban Municipal Agriculture Office Head Leo Tabing sa intrevista kan Bombo Radyo Legazpi na apat na mga barangay an tinamaan kan abo.
Komon na produkto sa mga apektadong barangay an niyog asin mga gulayan.
Afuera digdi, igwa man na mga fishponds an naapektaran kan ashfall kaya pig-aaram an pangangaipo kan mga apektadong residente.
Napag-araman na an ibang mga paraoma an nakapag ani na antes an pag-aalburuto kan bulkang Bulusan.
Sa presente padagos pa an pigigibong validation ngani na maaaraman an kabilugan na danyos sa sektor kan agrikultura asin pagsisira.
Segun ki Tabing na sa ibang pananon, igwa pa nin tsansa na maka-recover alagad an mga niyog an posibleng maapektaran an bunga huli ta mainit an abo.
Mientras tanto, an pagkaon man kan mga ataman na hayop partikular na kan ruminants an kinakaipuhan munang hugasan antes na ipakaon ngani na maibitaran an peligro sa salud kan mga ini.
