Engkwentro sa Sorsogon, isinabay sa lubong kan nagadan na top official kan NPA na si Ka Magno; landmines narekober sa pinangyarihan kan insidente

LEGAZPI CITY — Dakula an pagtubod kan mga opisyal kan militar na haloy ng pigmo-monitor kan mga rebeldeng New People’s Army (NPA) an saindang hiro asin garing inantisiparan na an operasyon kan mga suldados.
Segun ki 9th ID Public Affairs Office chief Capt. Randy Llunar, patunay na digdi an mga nakatanom na landmines sa pinangyarihan kan bakbakan kun sain igwa pang walong high powered unexploded landmines an nakua.
An mga pambasabog suboot na ini an rason sa pagkagadan kan duwang miyembro kan 31st Infantry Batallion asin pagka-irido nin pitong iba pa.
Dugang pa ni Llunar na posibleng ini an kabalusan kan mga rebelde sa haros magkakasunod na enkwentro sa probinsya kan ikinalagas kan saindang mga miyembro kaibanan na an nagadan na opisyal kan NPA na si Ka Magno na ipiglubong kasabay kan nangyaring bakbakan.
Mientrastanto, padagos man ngunyan an pursuit operation kan mga suldados kun sain nag-augment na kan iba pang pwersa ngani na mabantayan an lugar asin maibitaran na may makulugan na mga sibilyan.
Napag-araman na igwa man na nakuang mga armas an mga rebelde hali sa mga miyembro kan 31st IB.
Sa ngunyan nagtetenir na alerto an mga otoridad sa bilog na probinsya huli sa mga nakalihis na pronouncement kan mga rebelde na magsasagibo sinda nin tactical offensive kontra sa tropa kan gobyerno.