LEGAZPI CITY – Bako bastante para sa sarong election watchdog an ipigsugo na lifestyle check ni Presidente Ferdinand Marcos Jr. sa gabos na mga empleyado kan gobierno makalihis madiskubre an mga anomalya sa flood control projects.
Paliwanag ni Kontra Daya Convenor Prof. Danilo Arao sa intrevista kan Bombo Radyo Legazpi na dapat may kabale pa ining ibang aksyon arug kan pagpapanimbag sa mga proyektong dae natapos asin mga kinonsiderang ghost flood control projects.
Dapat man suboot na magsa-irarom sa lifestyle check an mga miembro kan lehislatura asin ehekutibo huli ta kadaklan sa mga pulitiko an pigtuturong kasabwat kan mga contractor sa paggibo nin katiwalian.
Nagtutubod man siya na may kasabwat an mga contractor na pwedesir nagtutukaw sa Senado o Kongreso huli ta dae man ini makakagibo kan pig-aapod niyang magic kun wara ini nin ka-kunchaba.
Pigtaram pa kaini na pwedesir man magbilog nin sarong komisyon na kompwesto nin mga private groups asin private citizen nganing masyerto na warang magigin dayaan sa lifestyle check asin nganing mapa-otob an transparency asin accountability.
Pagdoon niya pa na dapat Ombudsman an pwedesir man magkapot kan lifestyle check alagad sagkod sa presente suboot an wara pang na-idedesignar kun kaya nagtetenir ining palaisipan ngonian.
Pwedesir man na manduhan an pagsasagibo kan lifestyle check nin mga dating opisyal kan gobierno na warang bahid nin katiwalian asin dapat dae matawadan an saiyang digdinidad antes na maghali ini sa serbisyo publiko.
Pagdoon man ni Arao na afuera sa mga dating opisyal kan gobierno an dapat ikonsidera man an mga Non Government Organization leaders asin mga civil society group leaders sa pagkapot asin mangenot sa ikokondusir na mga lifestyle check sa gabos na empleyado kan Gobierno.
