Election watchdog kinondena an resolusyon kan COMELEC sa pagpaparehistro kan survey firms

LEGAZPI CITY—Kinondena kan election watchdog na Kontra Daya an resolusyon kan Commission on Elections (COMELEC) mapadapit sa mga survey firms na nagkokondusir nin election-related surveys sa tahaw kan election period na magparehistro sa saindang ahensya bago iluwas an resulta.

Basado sa Resolusyon 11117 na iniluwas kan ahensya kan nakaaging semana, pighayag kan Comelec na an mga pre-registered entities sana an awtorisado na magsagibo asin magpalakop sa publiko nin mga election-related surveys sa 2025 national and local elections magin sa Bangsamoro Autonomous Region in Muslim Mindanao (BARMM) elections.

Dugang digdi, na an obheto suboot kan nasambit na resolusyon iyo para malabanan an mga disinpormasyon.

Segun ki Kontra Daya Convenor Danilo Arao, sa intrevista kan Bombo Radyo Legazpi, na kun nakapagrehistro an sarong survey firm, bako man boot-sabihon na makatotohanan na an maluwas na resulta.

Dae man suboot kaipuhan an nasambit na pagpaparehistro, asin imbes na regulasyon—kaipuhan digdi iyo an pahigoton an fact-checking nganing ma-call out an mga pekeng surveys.

Dugang kaini na kun talagang pigplanuhan an naunambitang lakdang dapat ginibo ini kaito pa, siring man pinagdebatehan na asin naghagad na nin konsultasyon sa mga survey firm magin sa mga press freedom advocates.

Segun pa saiya na an rehistrasyon may kinaaraman man sa freedom of expression partikularmente na sa survey freedom o an libertad na makapagkondusir nin mga surveys.

Pigtaram ni Arao na baka pati an media, mga unibersidad, campus publications na nagkokondusir nin pre-election survey an magkaigwa nin rehistrasyon na kun saen posibleng mabayolar man ini sa libertad na pamamahayag.

Tinawan-duon man kaini na an surveys importante suboot huli ta nagtatao ini nin mga ideya sa publiko kun siisay an mangengenot digdi, asin digdi maikukumpara kun sisay an mawot na pipilion na kandidato.

Mientrastanto, pangapudan man kaini sa publiko na padagos sana sa pagbantay asin maghiro lalo na ngunyan na papaabuton na an eleksyon.