LEGAZPI CITY – Pigtaram kan sarong weather specialist na presenteng easterlies o paros na hale sa dagat pasipiko an nakaka-apektar sa enterong rehiyon Bicol.
Segun ki Jaime Bordales sa intrevista kan Bombo Radyo Legazpi na magdadara an easterlies nin maalinsangang panahon asin posible an kalat-kalat na mga pag-uuran, pagkikilat asin pagdaguldol partikulamente na pag-abot nin hapon sagkod banggi.
Sa ibong kan warang nanotarang Low Pressure Area an may nahihiling sindang cloud cluster na padagos nindang pigbabantayan asin nakatalaang magtao nin abiso sa mga masunod na oras asin aldaw huli ta may posibilidad ining magin bagyo.
Piglinaw niya man na wara nang nakabanderang gale warning sa mga kadagatan kan rehiyon asin laoman man giraray an banayad sagkod katamtamang alon mantang pinag-iingat niya man an mga parasisirang naggagamit nin sadit na sakayang pandagat huli sa huma na dara kan thunderstorm.
Pigtaram kan opisyal na enkaso mabilog bilang sarong bagyo an naunambitang cloud cluster an may posibilidad na sa extreme northern luzon an magigin track kaini.
Abiso ni Bordales sa publiko na padagos na mag-antabay sa mga advisory na ipigpapaluwas kan mga state weather bureau asin dae basta-basta magtubod sa mga exagerated weather update post kan ibang indibidwal o grupo nganing dae magkawsa kan saindang pagkahandal.
