LEGAZPI CITY- Liwat na nangapudan an Bureau of Fisheries and Aquatic Resources (BFAR) Bicol sa publiko na ibitaran na an iligal namga pagsisira na nagkakawsa nin pagkagadan nin mga hayop sa kadagatan.
Kasunod ini kan pagka-stranded kan nasa 25 mga dolphin sa Barangay Magais, Del Gallego, Camarines Sur kung sain 13 an nagadan.
Sa intrevista kan Bombo Radyo Legazpi kay Nonie Enolva an tagapagtaram kan BFAR Bicol, kinumpirmar kaini na base sa saindang imbestigasyon may nagsagibo nin dynamite fishing sa parte kan Calauag, Quezaon rason nganing magdulag paparayo an mga dolphin asin maapektaran an paglayo hasta sa mastranded sa baybayon.
Huli digdi nakipagkoordinar na an BFAR sa lokal na gobyerno kan Quezon ngani na mas pahigoton pa an pagbabantay kontra sa iligal na pagsisira asin maibitaran na an kapareho insidente.
Sa ngunyan nagsagibo naman an ahensya nin necropsy sa hawak kan mga dolphin nganing maaraman kung may ibang rason na nakadugang sa pagkagadan kaini.
Magigirumduman na marikas na nagresponde an BFAR asin lokal na gobyerno kan Del Gallego sa report kan mga residentes sa mga nastranded na mga dolphin kung sain 12 sa mga ini an naisalbar pa asin binuhian na sa kadagatan kan magbalik na an kusog.
