LEGAZPI CITY– Pighahanap na ngunyan kan mga otoridad an sarong motor an may plate number na EA 59778 na pigsasabing iyo an nilunadan kan duwang torong kanding na hinabon sa Albay Research and Development Center kan Department of Agriculture (DA) sa syudad kan Tabaco.
Sigon sa impormasyon gikan sa Tabaco City Police, pig-aataman an mga kanding ni Jefrey Capili, 31-anyos kun sain sinabi kaining dae nya man nabisto an mga parahabon.
Alagad nahiling suboot ni Gerald Balanga asin Pedro Buenconsejo na parehong residente kan nasambitan na lugar an suspek na nakalunad sa motor.
Pasiring sa syudad kan Ligao na direksyon kan behikulo.
Mientrastanto, kan beripikahon sa opisina kan Land Transportation Office (LTO) kun siisay na tagsadiri kan motor na ginamit kan parahabon, nagluwas na nakarehistro ini sa pangaran ni Jenalyn Recaido na taga Brgy. San Rafael, Guinobatan, Albay.
Pinadarahan nang surat si Recaido kan mga pulis ngani na haputon kun siisay an naggamit kan behikulo kan aldaw na ginamit ini sa panghahabon.
Kun in kaso mabisto an pangaran kan suspetsado, sasangatan sya nin kasong pagbalgar sa PD 533 o an Anti-Cattle Rustling Law.
