Irido an duwang menor de edad pagkatapos an nangyaring vehicular accident sa brgy. Binanuahan Bato, Catanduanes.
Segun kay PSSgt. Renen Delos Reyes, MCAD PNCO kan Bato Municipal Police Station na nasagasaan an mga ini kan sarong delivery rider na dae na kaini pinangaranan.
Pigtaram pa kaini na nagbalyo su duwang aki asin dae kaini nahiling na igwang motor an paparani sainda kaya ini nagkawsa nin aksidente.
Pigdugang man kaini na igwa suboot na pedestrian Lane sa pinangyarihan kan insidente alagad sa kahaluyan kan panahon, dae na suboot ini napinturahan pa.
Segun pa kay Delos Reyes na tulos man na nagresponde an saindang response center ngani matawan nin paunang lunas asin naka agad nin tabang sa saindang Mdrrmo.
Pigtaram man kaini na sa ngunyan na pinturahan na an naunambitang pedestrian lane nganing duman na magbaralyo an publiko.
Sa presente nakaluwas na suboot su mga aki asin mauron su mag-inibong na lado kun ano an sunod na gigibuhon sa naunambitang insidente.
Pagirumdom kaini sa mga magurang na turuan an mga aki na magbalyo sa mga tamang balyuhan asin mag iling sa mag inibong nganing maaraman kun may maaging behikulo kasabay man kan pangapudan sa mga driver na magin rigmat sa pagmaneho nganing maibitaran an siring kaining insidente.
