LEGAZPI CITY—Irido an duwang indibidwal makalihis an nangyaring insidente nin pananaksak sa Barangay Itba sa banwaan kan Manito, Albay.
Segun ki Manito Municipal Police Station Municipal Executive Senior Police Officer Police Executive Master Sergeant Manuel Morcoso, binisto an suspek na nairido na sarong 56-anyos, lalaki, may agom, sarong paraoma, asin residente kan Purok 4, Barangay Itba, Manito Albay.
May tama ini nin pananaksak sa saiyang kamot asin walang tagiliran na sa ngunyan nakaluwas na sa ospital.
Binisto man an nairidong biktima na sarong 49-anyos, may agom, sarong drayber, residente man kan kaparehong lugar.
May tama man ini nin pananaksak sa saiyang tulak asin sa may parte kan saiyang liog na presenteng nasa ospital asin nasa kritikal na kondisyon.
Napag-araman na dati nang may dae pagkasinabutan an pamilya kan mag-inibong na lado.
Segun sa opisyal na nasa impluwensya nin arak an suspek asin uminabot sa sarong diskusyon sa biktima na nagresulta sa panananaksak.
Narekober kan kapulisan an sarong sundang na iyo an ginamit sa pananaksak kan suspek sa biktima.
Dugang pa ni Morcoso, na basado sa salaysay kan suspek, na tinigbas suboot siya kan biktima kun saen nagsapo siya nin pananaksak, alagad naagaw kaini an patarom, kaya nagbalos suboot siya sa biktima.
Mientrastanto, abiso man kaini sa publiko na kun may diit na problema na pwedesir na maagi sa pag-oolay, dapat na sana ining resolbaran nganing dae na mag-abot sa siring na insidente.
