Naghagad nin despensa si Department of the Interior and Local Government (DILG) Secretary Juanito Victor “Jonvic” Remulla sa publiko partikular na sa saro sa mga naarestar huli sa polisiya na naghahalo sana nin semento sa parte kan Mandaluyong City.
Segun saiya, aminado siya na dae siya nakapagtao nin malinaw na mga direktiba kun pano ipapaotob an inisyatibo asin an mga ordinansa sa irarom kan Safer Cities Initiative na obheto sana na patahimikon an mga tinampo hale sa mga krimen.
Segun ki Remulla nakatalaang mag-olay an saiyang opisina katabang an iba pang mga law enforcement agencies asin magin an lokal na gobierno nganing maisaayos an mga konsiderasyon asin kakaipuhanon sa pagpapaotob kan mga polisiya sa irarom kaini.
Pagsierto kan kalihim sa publiko, na huli sa nagpuon na an pagpapaotob kaini an magpapadagos sa manlaen-laeng paagi nganing mamantinir an kaayusan sa mga komunidad.
Sa ibong kaini, sienerto man ni Remulla na pag-aadalan nindang maray an mga pagbabago asin konsiderasyon nganing masierto na dae na mauutro an mga siring na insidente.
Sa huri, sinabi ni Remulla na obheto sana ninda na mamantinir nin maayos an mga kalsada asin mga komunidad na piglalaoman kan publiko alagad tinawan-doon na dae ini magigin perpekto nganing padiit-diit na bawasan an krimen sa mga tinampo sa nacion.
