Legazpi City– Arestado an mag live-in partner sa isinagibong buy-bust operation kan Malinao Municipal Police station sa parte kan Barangay Burabod, Malinao Albay.
Sa intrevista kan Bombo Radyo Legazpi kay PCPT. Ivyn Villanueva, an Chief of Police kan Malinao MPS, sa isinagibong buy bust operation napag-araman na magkapirang beses na man na naarestar an duwang suspek sa kapareho man na bayolasyon.
Binisto an mga suspetyado na sina Alyas “ALDO ” 48 anyos asin makatulong beses nang nadakop kan mga otoridad sa pagpapabakal nin ilegal na droga mantang naarestar man si Alyas “MITCH” 40 anyos asin duwang beses nang nahampang sa kaparehong kaso.
Nadakop an mga suspek makalihis na magpabakal an mga ini nin pinagtutubudang shabu sa Poseur- buyer kan PNP.
Apwera sa ilegal na droga, nakumpiskar man sa mga suspek an iba pang mga droga na maabot sa 11 grams asin iba pang mga drug parapernaliya.
An mga suspek an mahahampang sa kasong pagbayolar sa RA 9165 o Comprehensive Dangerous Drugs Act of 2002.
