LEGAZPI CITY- Regular na nagsasagibo nin monitoring an Department of Trade and Industry Sorsogon sa presyuhan kan school supplies.
Ini an katakod kan pinaglalaoman na pagdakol kan mga konsumidores huli sa paparaning pagbabalik kan klase.
Segun ki Department of Trade and Industry Sorsogon Director Malou Pancho sa intrevista kan Bombo Radyo Legazpi na antes pa man magbaba nin suggested retail price an national office, padagos na an saindang paglilibot ngani na mabantayan an presyuhan kan nasabing mga produkto.
Sa presente wara man na nahiling na paglangkaw asin laog man suboot gabos sa pigpapaotob na suggested retail price.
Inasegurar man kan opisyal na bastante an supply kan school supplies sa provincia.
Mientras tanto, pinayuhan man ni Pancho an mga magurang na pilion an mga produkto na abot kaya alagad igwang magayon na kalidad ngani na dae madifisilan an mga ini sa pagba-budget.
