LEGAZPI CITY- Nakatutok na ngunian sa pagmomonitor an Department of Trade and Industry Bicol sa mga presyohan kan mga kandila asin burak antes an Undas.
Segun kaya Ruben Sombon, an Consumers Protection Chief kan DTI Bicol sa intrevista kan Bombo Radyo Legazpi, pigpunan na ninda an pagmomonitor sa mga presyohan kan mga kandila, burak asin magin an presyo kan mga bottled water sa mga terminal ngunian na paparani na an pagrumdom kan aldaw kan mga kalag asin Todos Los Santos.
Sa ngunian wara pa man ining nahihiling na pagtaas kan presyohan kan mga ini alagad pangapudan kaini sa mga nagpapabakal na dae pag-abusuhon an mga parabakal sa nasabing okasyon.
Dugang pa kan opisyal na bastante pa an suplay kan mga burak sa lokal man o magin sa Dangwa na saro sa pigkukuwaan nin mga burak.
Hagad kan opisyal na dae lang agihan nin makukusog na bagyo o uran an rehiyon ngane na maasigurar na dae magkulang sa suplay kaini.
Mientrastanto, abiso kan DTI sa publiko na ireport tulos sa saindang opisina kun enkaso man na igwa sindang manutaran na over pricing sa mga nasabing produkto kun saen sainda man ining aaksyunan.
