LEGAZPI CITY-Ipigsugo kan Department of Trade and Industry (DTI) sa mga e-commerce platforms na tulos halion an mga asin bako rehistradong vape products sa saindang mga website, asin nagbalalang posibleng patawan nin padusa.
Segun sa ahensya, kadakol na vape products online an warang tamang permit, health warning, asin BIR stamp, na nagbabayolar sa mga ley siring kan Consumer Act, Republic Act 11900 o Vape Law, mga regulasyon kan Department of Health asin kan mga patakaran kan Bureau of Internal Revenue.
Ipighayag ni Eryl Royce Nagtalon, Officer-in-Charge kan DTI E-Commerce Bureau na malinaw na pagbayolar sa ley kaya kinakaipuhang ipapundo na ini.
Poon 2022, nakapagtala na an ahensiya nin labo sa 92,000 vape listings online.
Bilang tugon, tinawan nin 7 aldaw na compliance period an mga e-commerce platforms ngani tanggalon an mga ilegal na produkto.
Padagos man an pigsasagbong monitoring asin spot checking kan ahensya.
Nagpatanid man sinda na enkaso dai magsunod an mga platform, pwedisir sindang patawan nin administrative fines, posibleng ma-blacklist, asin maisyuhan kan takedown order katakod kan Internet Transactions Act asin iba pang mga ley.
