LEGAZPI CITY—Wara pang nairerehistrong kaso ngunyan nin overpriced noche buena items an Department of Trade and Industry Bicol (DTI Bicol) sa rehiyon.
Segun ki Ruben Sombon an Consumer Protection Head kan DTI Bicol sa intrevista kan Bombo Radyo Legazpi susog sa saindang datos na wara pa man suboot na nagbabalgar na mga establishamento mapadapit sa ipinaluwas na price guide kan saindang ahensya.
Sinabi kan opisyal na may kasunduan an DTI asin an mga manufacturers manungod sa price guide kan mga barakalon asin ini ipapaotob hanggang Disyembre 31 kan presenteng taon na kun saen wara nang may maliwat sa mga presyo kaini.
Dugang pa ni Sombon na wara pa man sindang nareresibing mga reklamo mapadapit sa mga expired na mga produkto.
Sinabi kaini na dae man kaipuhan na mag-panic buying huli ta yaon man an saindang ahensya para mag-monitor kan mga presyo sa merkado asin pig-asigurar man kaini an mga konsumidores na masusunod an saindang ipigpaotob na price guide.
Nagpaguiromdom man an opisyal na ibitaran an pig-aapod na ‘Christmas rush’, maglaan ki budget para sa barakalon, asin kun mabakal man sa online sinabi kaini na siertohon na an mga online sellers igwang return exchange mechanism sa mga lehetimong online selling platforms, siring man an paghiling sa resibo kan saindang mga binakalan.
