LEGAZPI CITY – Lugadan an sarong truck driver makalihis na makabangga sa jeep asin tumagilid an pigmamaneho kaining behikulo sa Barangay Caratagan kan Pio Duran, Albay.
Sa intrevista kan Bombo Radyo Legazpi kay Noel Ordoña an head kan Pio Duran Municipal Disaster Risk Reduction and Management Office, pasiring sa direksyon kan Pio Duran port an truck na pigmamaneho kan driver na si EJ Orsil.
May karga ining mga motorsiklo na ibabiyahe kuta pasiring sa Masbate.
Alagad pag-abot sa pakurbada asin pababang parte kan tinampo, nakasabatan kaini an sarong jeep asin tricycle.
Binalo pang likayan kan truck an mga kasabat na behikulo alagad nasagi kaini na jeep, rason ngani na magtagilid an jeep.
Nagsapar nin mga garos asin lugad sa hawak an truck driver alagad nasa maray naman ining kondisyon makalihis na matawanan nin medikal na atensyon kan mga nagrespondeng personahes kan Municipal Disaster Risk Reduction and Management Office.
Sa ngunyan nahali na an truck kung kaya balik naman sa normal an bulos nin trapiko sa lugar.
Huli sa insidente, plano kan lokal na gobyerno kan Pio Duran na palawigon asin gibohon ng diretso an tinampo sa lugar ngani na maibitaran na an mga siring na aksidente
