LEGAZPI CITY – Pigtaram ni Dr. Patrick Azanza na kadakol na mga pangyayari an nakahampang niya sa enot na aldaw kan pag-asumir kaini sa pwesto bilang gobernador kan provincia kan Catanduanes.
Segun saiya sa intrevista kan Bombo Radyo Legazpi na kadaklan sa mga piggigibo niya sa ngonian iyo an mga serye nin mga meeting kairiba an mga manlain-laing ofisina kan gobierno sa saindang provincia.
Mawot niya na buksan an kapitolyo sa mga ordinaryong namamanwaan nganing mamatean kan mga ini na dae ninda kaipuhan nin appointment nganing direktang makahagad saiya nin tabang asistensya tuyong aldaw nin martes.
Maski problema sa pagkamoot an pwedesir magrani sa saiyang opisina asin dae siya maduwang isip na magtao nin abiso sa mga ini nganing mamatean kan saiyang nasasakupan na nadadangog kan gobierno provincial an saindang mga agrangay.
Pigtaram pa kan opisyal na plano niya man na maidara sa mga barangay sa Catanduanes an mga pangenot na serbisyo asin pangangaipuhan kan saindang mga residentes.
Maugma siya huli ta suportado siya kan gabos sa pagpoon kan saiyang pagserbi asin sa pagpapagayon kan saindang provincia.
Nakikipag-olay na man siya sa manlain-laing politiko para sa posibleng pakikipagtabangan sa saiyang mga programa para sa ika-uuswag kan Catanduanes.
Pagsyerto man ni Governor Azanza sa saiyang nasasakupan na mahingoa siya asin an saiyang mga opisyal nganing matabangan an mga nasa laylayan na labing nangangaipuhan kan saindang serbisyo.
