LEGAZPI CITY- Nagpaliwanag an Department of Public Works and Highways (DPWH) sa ginibong pagtangkas kan ahensya sa boundary marker sa Tiwi, Albay na pigtutuyaw sa ngunyan kan nagkapirang netizens sa social media.
Sa intrevista kan Bombo Radyo Legazpi kay Lucy Castañeda an tagapagtaram kan DPWH Bicol, tinawang duon kaini na nasasabutan kan ahensya an reaksyon kan publiko lalong pang buwis na hali sa mga Filipino an ginastos sa pagpapatugdok kan nasabing marker.
Alagad kinaipohan na talagang halion ini lalo pang four lanes na an tinampo asin saro ng obstruction an nasabing marker na posibleng magkawsa nin aksidente.
Segun kay Castañeda, nagkapirang mga motorista naman an nagrani sa saindang opisina nganing ipaabot an reklamo sa nasabing marker na nakaharang na sa mag-inibong na lado kan tinampo asin peligrosong magkawsa nin aksidente.
Nilinaw man kan opisyal na may koordinasyon an DPWH sa lokal na gobyerno na nagtao man nin go signal asin nagtugot sa pagtangkas kan nasabing marker.
Napag-araman na dakol pang mga boundary marker sa bilog na Bicol an nakatalaan na tangkason kan DPWH bilang parte kan programa kan gobyerno na mahali an mga obstruction lalo pang padagos an pagpapadakula kan mga tinampo sa rehiyon.
