LEGAZPI CITY-Kinumpirma kan Department of Justice na nakipag-olay sinda sa Japan mapadapit sa mga kamawotan kaini na dagdag sa mga kagamitan sa ikinasang ‘search and retrieval operations’ sa Taal lake.
Kung sain nagbisita pa an mga kinatawan kan Japan Embassy sa opisina kan nasambitang kagawaran ngani mapag-olayan ini.
Segun mismo kay Justice Secretary Jesus Crispin Remulla, pinagolayan ninda an mga posibleng sublion kan Pilipinas sa Japan ngani mapadali an pagsasagibo kan paghahanap sa bangkay kan mga sabungero.
Algad afuera pa sa mga dagdag na gamit, mawot man kan Department of Justice na makapagtao nin asiste an Japan sa pagsasagibo kan DNA testing.
Pigpaplanuhan kan ahensiya na isairaom an mga narekober na mga tulang sa Taal lake sa DNA testing ngani maaraman kung matugma ini sa DNA samples kan pamilya kan mga nawawarang sabungero.
Pigsierto man ni Justice Secretary Remulla, dawa dai pa naghihiro an Japan, na importante suboot ining mapoonan siring kan pagproseso sa mga kaipuhan pang mga gamit.
Piglilinaw man kan opisyal na dai ibig sabihon na warang bastanteng kakayahan an mga ahensyang katuwang kan kagawaran sa pag-iimbestiga.
Obheto suboot kaini na makakuwa nin iba pang mga tabang para mapadali an imbestigasyon orog na kung aminado an kagawaran na bako madali an pigsasagibong imbestigasyon.
Piglalaoman man kan Department of Justice na makakadagdag ini sa mga ebidensiyang posibleng magamit sa padagos na ‘case buildup’ mapadapit sa pagkawara kan mga sabungero.
