LEGAZPI CITY-Kinumpirmar kan Department of Justice na natapos na ninda an preliminary investigation sa nangyaring pag-kidnap asin panggagadan sa negosyanteng si Anson Que.
Sa pampublikong pahayag kan departamento, ipighayag ninda na igwang bastanteng ebidensya o prima facie evidence na igwang reasonable certainty of conviction laban sa suspechado sa nasabing panggagadan.
Kung sain igwang nakuang ebidensya na pwedisir magtao nin liwanag sa nasabing kaso sa suboot pagkaimbwelto ni Gong Wen Li o mas midbid sa alyas na Kelly.
Magigirumduman na kan ika-29 kan Marso 2025, nakuang wara na nin buhay an 67 anyos na negosyanteng si Anson Tan Que kaibahan an saiyang driver sa Paranaque City.
Basado sa konklusyon kan nasabing enot na imbestigasyon, nagpaluwas nin resolusyon an Department of Justice na isumiter an kasong ini sa korte kan Kidnapping for Ransom with Homicide laban kay Kelly.
Ipigrekomendar man kan saindang resolusyon na i-refer sa Philippine National Police Anti-Cybercrime group an nagkapirang iba pang mga respondents para sa case build-up kan pagbalgar sa ley.
Alagad, nanindugan an departamento na dai ini nangangahulugan na tulos na ‘guilty’ an suspechado, kundi direktiba sana ini na ipadagos an pagbista sa paagi kan pagpresentar nin specific na evidencia.
An DOJ sinasabing lubos na komitado sa pagsuporta sa pagkondusir nin matanos asin daing kinakampihan na imbestigasyon ngani maserbihan an interes kan banwaan susog sa prinsipyo nin pagigin bako bias asin due process.
