LEGAZPI CITY-Pigpapa-promote kan gobierno an Pilipinas na maging oil storage hub para sa bilog na Asya, susog sa Department of Energy (DOE).
Sinabi kan ahensya na an plano iyo na tugutan an ibang nacion na maggibo nin storage facilities sa Pilipinas.
Segun ki ni Energy Secretary Sharon Garin na pigma-market na kan Pilipinas ngani maging regional hub para sa ASEAN community o kaya sa bilog na asya na posibleng magbilog nin mga storage facility sa nacion asin pwedisir na makapag-store o mag-stockpile digdi.
Alagad sinabi kan departamento na enkaso magkaigwa nin emerhensya sa langis, an Pilipinas an magiging prayoridad.
Enot nang pigbuyagyag kan ahensya na an Aramco kan Saudi Arabia, saro sa pinakadakulang mga kompanya nin petrolyo asin enerhiya sa kinaban, asin pigkokonsiderang sentro kan oil export hub sa Bataan province.
An propwestong Bataan site an pagsasadiri kan state-run Philippine National Oil Company (PNOC).
An Bataan pighihiling man bilang lugar para sa 15-million-barrel reserve bilang parte kan national oil stockpiling program.
Dugang pa kan ahensya na an indicative cost asin timeline para sa national oil stockpile kan Pilipinas, pig-eestimar na nasa P5 billion ngani makagibo nin sistema na kayang magtipon nin 500,000 sagkod 1 milyon na bariles.
Mientrastanto, padagos pang naghahanap nin deal sa ibang nacion an ahensya apwera sa Middle Eastern region para sa fuel supply kan nacion.
