LEGAZPI CITY – (Update) Inasegurar kan Department of Interior and Local Government (DILG) Bicol an pakikipagcoordinar sa kapulisan tangarig na matawanan nin hustisya asin maresolber an panggagadan sa sarong Sangguniang Kabataan (SK) chairman sa Brgy. Ibaugan, Daraga, Albay.
Kasabay kan ikaapat na State of the Nation Address (SONA) ni Presidente Rodrigo Duterte kan pagbabadilon-gadan kan apat na armadong kalalakihan si SK chairman Jane Nunez Moneda, 25-anyos.
Sa ekslusibong intrevista kan Bombo Radyo Legazpi ki DILG Bicol Director Atty. Anthony Nuyda, ipinaabot na saiya kan provincial office an impormasyon alagad blangko pa sa motibo kan panggagadan sa biktima.
Ipighahanda naman an itataong asistensya para sa nawalat na pamilya kan nagadan.
Sa succession o pagribay sa nawalat kaining posisyon, an Top 1 Councilor an ma-asyumer sa pwesto bilang SK chairman mantang magkakaigwa nin assemblea asin duman masagibo nin special elections para sa iba pang mababakanteng pwesto.
