
LEGAZPI CITY – Dae na ikinakigkig kan sarong political analyst an nagin desisyon kan korte suprema na nagin unconstitutional suboot an impeachment complaint laban kay Vice President Sara Duterte.
Segun ki Atty. Michael Henry Yusingco sa intrevista kan Bombo Radyo Legazpi na bago pa magpaluwas nin desisyon an supreme court an may nahihiling na ining iregularities sa proseso kan impeachment na nangyari sa house of representatives.
Alagad pigngalasan man niya na nagin marikas an pagpapaluwas kan desisyon asin nataon na pirang aldaw antes an ika-apat na state of the nation address ni Presidente Ferdinand Marcos Jr.
Paliwanag niya pa na nagin February 6, 2026 an magigin katapusan kan 1 year ban sa pagsusunad nin impeachment complaint an huli ta kan February 5, 2025 an na-isunad an enot na tulong complaint laban sa bise na dae naaksyunan kan House asin na-archived.
Dugang pa kan nasabing political analyst na saro sa mga epekto kan desisyon an mawawaran man nin hurisdiksyon an senado na mag-convene bilang senate impeachment court asin litison si VP Sara huli ta pinawarang bisa na ini kan korte.
Kun enkasong idagos kan senado an trial an dae man kaini oobligahon an mga respondents huli ta pwedesir ining sumunod sa kasuguan kan halangkaw na hukuman na pwedesir man humantong sa iriwal kan mga political departments kan gobierno.
Kun siya an hahaputon an dae man nakiaram an korte suprema sa proseso na isinagibo kan house asin senado asin dae linaog an merito kan mismong impeachment complaint kundi hiniling man sana kun nasunod an nakasaad sa Saligang Batas.
Pagdoon pa ni Atty. Yusingco na pigtawan linaw man sana kan desisyon an tamang proseso kan pagkapot kan impeachment kun kaya dapat na magsunod sa proseso an house of representative na nasususog sa Saligang batas.