LEGAZPI CITY – Bilang parte kan pdagos na preparasyon para sa papaabot na kralasehan kun saen magiging full-swing na an implementasyon kan K-12 program, abilable ngunyan sa Department of Education (DepEd) Bicol an 4,000 na bagong teaching posts antes an pagpupuon kan school year 2017-2018.
Base sa Memorandum kan DepEd-Central Office, tinawan an regional office nin inisyal na detalye kan bagong teaching positions na aprubado kan Department of Budget and Management (DBM).
Sa enterong 13 schools division sa kabikolan, ipig-alokar an teaching posts sa kindergarten, junior high school, asin senior high school.
Sa initial breakdown, base sa report kan departamento, ipig-alokar an 2,424 bagong teaching posts para sa senior high school, 724 sa kindergarten, asin 563 posts para sa junior high school.
An Camarines Sur Schools Division man an natawan kan mas dakol na numero kan bagong new teaching vacancies na igwang 1,026 posts, mantang an Iriga City Schools Division an may pinakadiit na igwang 28 bagong teaching posts.
