LEGAZPI CITY – Inenganyar kan Department of Science and Technology (DOST) Bicol an publiko na magpartisipar sa mga ipigsasagibong aktibidad kan opisina.
Sa intrevista kan Bombo Radyo Legazpi ki Department of Science and Technology Bicol Regional Director Rommel Serrano, dagos-dagos an pagkondukta ninda nin training na inapod na BrownBagTechTalks.
Obheto kaini na maituro an manlain-lain na application kan science and technology siring kan Food Safety, Good Manufacturing Practices asin kadakol pang iba.
Bukas an training sa mga estudyante dawa anong kurso, mga negosyante asin magin an mga indibidwal na warang hilig sa science and technology.
Segun ki Serrano, libre asin wara nin anuman na babayadan sa nasabing aktibidad an mga partisipante.
Mientras tanto, sinabi kan opisyal na inapod na BrownBagTechTalks an nasabing aktibidad ngani na komportable an environment para sa mga partisipante bako arog kan mga regular training na seryoso.
Sa mga interesado asin mawot magpartisipar sa training an mag-message sana sa page kan Department of Science and Technology Bicol.
