LEGAZPI CITY – Pigpalawig kan Department of Environment and Natural Resources Bicol an plano na reforestation sa mga lugar kan rehiyon katakod kan saindang National Greening Program.
An reforestation, iyo an proseso sa paagi nin padagos na pagtatanom nin mga kahoy ngani masalidahan asin madagdagan an mga ini sa mga kabuludan.
Segun kay Atty. Ronnel Sopsop, Assistant Regional Director kan Department of Environment and Natural Resources Bicol sa saindang provincial management conference, makakatabang an prosesong ini ngani masegundahan an plano kan Department of Public Works and Highways (DPWH) na pagpapalawig man sa flood control sa mga lugar kan provincia.
Dagdag pa kan opisyal, nakikipag koordinar na an saindang Bicol River Basin Management Committee (BRBMC) sa iba pang ahensiya kan gobyerno asin mga stakeholders para sa mga plano katakod kan saindang programa.
Magigirumduman na naglunsar an nasambitang ahensiya nin programa ngani makapagtanom nin 3 Milyon na mga kahoy kan nakaaging taon ngani mabawasan an padagos na pagdiit kaiini asin maibitaran an climate change.
