LEGAZPI CITY- Magsasagibo man nin deformation survey an Philippine Institute of Volcanology and Seismology (PHIVOLCS) ngonian na semana sa Bulkang Mayon sa Albay.
Kasunod ini kan anunsyo sa pagbaba sa normal status kan Bulkang Bulusan sa Sorsogon kasuodma.
Pag-eksplikar ni PHIVOLCS resident volcanologist Dr. Ed Laguerta sa intrevista kan Bombo Radyo Legazpi, dawa na diit na linog sana an nairehistro sa bulkan, mantenidong halangkaw an gas output digdi na nag-aabot sa 1, 000 hasta 3, 000 tonelada kun ikukumpara sa baseline value na 500 tonelada.
Ini man an rason kan pagtenir sa Alert Level 2 status kan bulkan o moderate level of unrest.
Sa ibong na lado, pighihiling man na posibleng kaibanan an variation sa paghubag asin pag-impis sa edifice kaini magin an halangkaw na buga kan asupre sa proseso kan Mayon volcano pasiring sa normal status.
Sa presente, hibaba na an pressure huli sa diit na linog na nairerehistro alagad pigbabantayan kan PHIVOLCS kun igwang maobserbahang bagong tremor na magigin indikasyon sa pagsakat kan panibagong magma sa chamber.
