LEGAZPI CITY-Nagrapado na sa 26 an nairehistrong mga nagadan sa pananalasa kan mga nakalihi na bagyong Nando asin Opong, basado sa datos kan National Disaster Risk Reduction and Management Council (NDRRMC).
Sa saindang situational report, nasa 4 an nairehistrong gadan sa Cordillera Administrative Region (CAR), mantang 22 man an pigbeberipika sa iab pang rehiyon kairiba na an Cagayan Valley, Central Luzon, Bicol Region, Central asin Eastern Visayas.
Nairehistro man an 33 katawo na irido kun sain 14 digdi an pig-validate pa asin 14 pang iba an presenteng nawawara.
Mientrastanto, labi sa 738,000 pamilya o haros 2.8 milyong indibidwal man an apektado kan nakalihis na bagyo kun sain labi sa 46,000 pamilya an nagtetenir pa sa mga 2,680 evacuation centers, asin labi sa 31,000 pamilya an naabutan na nin tabang sa luwas kan evacuation centers.
Susog sa ahensya na nangengenot an Bicol Region sa mga may apektadong indibidwal, orog na sa Masbate kun sain tuminama an bagyong Opong.
Dagdag pa kan ahensya na nasa P864 million an winalat na danyos sa imprastruktura kan mga nakalihis na bagyo hale sa manlain-lain na rehiyon mantang nagabot man sa labi P1 billion an nagin pinsala sa agrikultura.
