LEGAZPI CITY-Kinondena kan House Deputy Minority Leader asin Mamamayang Liberal (ML) Partylist Rep. Leila De Lima an pinakahuring insidente nin harassment kan Chinese Coast Guard sa West Philippine Sea (WPS) na nagresulta sa pagka-irido kan tulong mga Pilipinong parasira makalihis gamitan nin water cannon an saindang mga bangka.
Segun ki De Lima, nangyari an insidente sa Escoda Shoal na malinaw na nasa laog kan Exclusive Economic Zone (EEZ) kan Pilipinas.
Apwera sa pagkaraot kan mga bangka asin pagkawara nin kabuhayan kan mga parasira, nabugtak man sa peligro an saindang buhay huli sa delikadong aksyon kan Chinese Coast Guard, kabale na an agresibong pagmaniobra kontra sa mga sakayang pandagat kan Philippine Coast Guard (PCG).
Pigduon kan mambabatas na ini an pinakaenot na pagkakataon na direktang naggamit nin water cannon an Tsina laban sa mga sibilyan na Pilipinong parasisira na malinaw na sarong paglangkaw kan agresyon.
Partikularmenteng nahahadit si De Lima na bako sana mga PCG vessels an pigpupuntirya kan Chinese Coast Guard kundi kasabay an mga inosenteng namamanwaan.
Nangapudan si De Lima nin tulos na aksyon hale sa gobyerno ngani i-depensa an derichos asin kaligtasan kan mga Pilipinong parasisira asin mapundo an padagos na pang-aabuso sa laog kan sadiring teritoryo kan nacion.
Hinagad man kaini an presensya kan Philippine Navy na magin mas proactive sa pagdepensa sa mga sibilyan sa laog kan Exclusive Economic Zone asin palayason an mga dayuhan sa nasabing teritoryo.
