Nagtutubod si dating International Criminal Court (ICC) Judge Raul Pangalangan na supisyente na an iprinesentar na ebidensya kan prosecution nganing i-convict si dating presidente Rodrigo Duterte.
Segun sa dating husgado asin dating dean kan U.P. College of Law, makusog an evidenciang iprinesentar kan prosecution sa enot na aldaw kan hearing, asin supisyente na suboot ini nganing makumbinsi an mga husgado kan ICC.
Antes pa magpoon an hearing, piglalaoman suboot ninda na ipresentar kan panel an saindang witness nganing ipahiling an merito kan saindang kaso.
Alagad pigdetalye suboot kan mga prosecutor an nagkapirang ‘specific details’ kan mga kaso laban ki Duterte, kabale an mga video clips na nagpapahiling kan mga kontrobersyal na pahayag na ginibo kan dating presidente.
Dai man pighale kan dating ICC judge an posibilidad na pighahanda asin pigtitipon pa kan panel an saindang ‘strongest evidence’ para sa trial proper, enkaso mang umusad an kaso hale sa confirmation stage.
Kabali sa mga iprinesentar kan panel sa enot na aldaw kan confirmation hearing kan dating presidente iyo an mga video kan dating presidente kun sain pig-aako niya an nagkapirang mga paggadan, siring man an pirang kontrobersyal na orden na ipinaluwas kan kasagsagan kan illegal drugs campaign.
Sa nagin pahayag man na ginibo kan senior trial lawyer kan Office of the Prosecutor na si Julian Nicholls sa kasagsagan kan hearing, sinabi niya na makusog an ebidensya kan prosekusyon asin may kakayanan na an panel na i-convict an dating presidente, kun magdesisyon sana an mga judge na magpadagos ini sa sarong full trial.
 Judge Raul Pangalangan believes that the evidence presented by the prosecution is sufficient to convict former President Rodrigo Duterte.){kind=link}