LEGAZPI CITY-Inanunsyo kan Commission on Election (Comelec) an pamamaaram kan dati kaining tagapagtaram na si James Jimenez ngonian na Miyerkules, Enero 28, 2026.
Nagserbi si Jimenez bilang Director IV kan Education and Information Department ka nasabing Komisyon.
Sa pahayag kan komisyon, tinawan nin pagpupugay si Jimenez na nagserbing Spokesperson asin Director IV kan Education and Information Department kan nasabing komsiyon asin pigbibistong nagserbi nin may integridad, asin bilog na dedikasyon sa institusyon asin sa sambayanang Pilipino.
Poon kan Hulyo 2006 hasta sa saiyang pagretiro kan Setyembre 2022, si Jimenez an naging pangenot na tagapagtaram kan Comelec sa publiko.
Siya an may kapot kan mga rekord bilang pinakahaloy asin pinakajoven na itinalagang spokesperson kan gobierno sa panahon kan saiyang pagkakaelihir.
Nagpaabot nin pakikidumamay an Comelec sa pamilya asin pigbisto an saiyang naiambag sa pagbubusol kan election transparency asin voter education.
Segun sa komisyon, magtetenir na memorya an siyang propesyonalismo, boses, asin tibay sebisyo publiko.
