LEGAZPI CITY – Naresibe na ni Daraga Mayor Carlwyn Baldo asin anom pang suspek an subpoena na isinirbi kan Criminal Investigation and Detection Group (CIDG) katakod kan pagkakaimbwelto sa pagadan ki Ako Bicol Rep. Rodel Batocabe asin police escort kaining si SPO2 Orlando Diaz.
Sa intrevista kan Bombo Radyo Legazpi kay CIDG Albay Chief Officer Police Chief Inspector Ronie Fabia, obheto kaining ipaaram sa mga akusado an kasong isinunad kontra sainda kan Special Investigation Task Group (SITG) Batocabe.
Tatawan suboot nin sampulong aldaw an mga akusado ngani na simbagon an mga akusasyon kontra sainda asin magsumite nin counter affidavit.
Dugang pa ni Fabia na nagkokundusir na man nin suway na legal na lakdang an saindang national office dapit sa kaso kontra sa alkalde.
Marurumduman na enot nang nagsunad an PNP nin kasong double murder asin six counts nin frustrated homicide kontra ki Baldo asin anom pang kasabwat kaini sa pagadan sa lehislador.
