LEGAZPI CITY- Nagsakat pa sa P527.2 million an danyos sa sektor kan agrikulura sa Bicol region huli sa nag-aging bagyong Pepito.
Segun ki Department of Agriculture Bicol spokesperson Lovella Guarin sa intrevista kan Bombo Radyo Legazpi na pinakadakulang danyos an naisrehistro sa industriya kan abaca na nasa P483 million.
An nasabing abaca losses an hali sa provincia kan Catanduanes, Camarines Sur asin Camarines Norte.
Sa ibong kaini kumpiyansa an opisyal na marikas na makaka-recover an provincia huli na nakapaghanda man sa pag-abot kan nasabing raot nin panahon.
Katunayan, segun ki Guarin na nasa kabilugan na P40.4 million na an intervention na pinuunan na ipaluwas kaibanan na an banhi para sa hybrid rice, garden tools, vegetable seeds asin iba pa.
Target man kan ahensya na maipaabot an nasabing mga intervention sa gabos na mga local government unit sa urog na madaling panahon.
Aminado kaya an opisyal na kinakaipuhan nin tabang kan mga apektadong paraoma ngani na liwat na makabangon hali sa epekto kan kalamidad.
