Legazpi City- Puminakol na sa labi P500M an nagin danyos sa industriya kan abaka sa probinsya kan Catanduanes nin huli sa pananalasa kan Bagyong Kristine kan nakaaging semana.
Segun kay PhilFiDa Catanduanes Provincial Fiber Officer Bert Lusuegro sa intrevista kan Bombo Radyo Legazpi na base sa saindang initial damage assessment na poco mas o menos 10,000 na ektarya kan abaka an pinadapa kan nasabing bagyo katumbas kan maabot sa 14,000 an mga para-abaka an naapektaran sa enterong probinsya.
Pigtaram man kaini na madudugangan pa an naitalang mga numero nin huli ta dae pa tapos an piggigibong assesment kan saindang opisina sa probinsya.
Sa presente, dae man ini nahahandal sa huma kan bagyong leon nin huli ta bako man suboot makusog an pigdadara kaining pag-uran sa saindang lugar.
Pigsabi man ni Lusuegro na pigtatarawan na man nin tabang kan mga lokal na gobyerno sa probinsya an mga para-abakang naapektaran asin masagibo ini nin intervention para sa rehabilitation kan nasabing prudokto.
Mahahaluyan suboot na makarecover an sektor kan pag-aabaka sa Catanduanes partikular na sa mga na totally damage asin pinaka-amay na suboot an duwang taon nganing makabawi an mga ini sa pagkalugi.
Sa ngunyan, diit lang an supply kan mga abaka nin huli ta kadakol an nasayang asin dae na napakinabangan alagad dae man kaini mapapaluya an exportation kan produkto nin huli ta kadakol man gilayun sa nasyon an dae man naapektaran kan bagyong kristine.
Pigmawot kan opisyal na matawan nin pundo kan national agencies nganing mapoonan na an rehabilitation program sa mga abaka asin pagirumdom kaini sa mga para-abaka na i-ensured an saindang produkto sa Philippine Crop Insurance Corporation nganing masyerto na mababayadan an mga nadanyaran na mga abaka nin huli sa raot kan panahon.
