Handa nang ibuyagyag ni dating Ilocos Sur Governor Chavit Singson kun ano an saiyang aram manungod sa mga nadiskubreng anomalya sa mga flood control projects kan gobierno.
Masasambit niya suboot an sarong dakulang personalidad sa oras na siya an magtindog o mag-appear sa maabot na hearing kan Senado.
Sa naging paghahapot kan Bombo Radyo sa dating gobernador, inasegurar kaini na sasambiton niya an mga pangaran na imbwelto sa isyu kan flood control.
Alagad, kan hinapot kun siisay o anong partikular na posisyon ini, nagsayuma siyang maghiras huli ta pigdoon niya na sa Senado na sana niya ini sisimbagon.
Abo niya suboot na pangenotan an hearing kan Senate Blue Ribbon Committee sa imbestigasyon sa siring na mga kontrobersyal na proyekto.
Siring man, pigsierto niya na maatendir asin mapahiling siya sa hearing enkaso imbitaran o ipaapod kan komite kan Senado.
Sa ibong kaini, pig-oktaba kan Senado an nakatalaan na pagbabalik kan komitiba nganing ipadagos an hearing sa imbestigasyon sa flood control.
Gigibuhon kuta ini kan Abril 14 alagad dae na nadagos huli ta pighahalat pa kan pormal na pagsumiter kan affidavit ni dating Gov. Singson.
Maski an mga pirma kan nagkapirang senador asin iba pang rason an pigkonsiderar man sa pag-oktaba kan nakatalaan na petsa.
Pinahimutikan kan dating gobernador na siya an rason kun nata dae nadagos an hearing.
Handa man suboot siyang magdara kan saiyang pahayag sa senado anuman na oras kun hagadon ni Sen. Panfilo Lacson na nagseserbi bilang Chairperson kan Senate Blue Ribbon Committee.
Nagsayuma si former Gov. Singson na ihiras an laog kan saiyang pahayag o ‘affidavit’ na plano niyang isumitir sa komite o opisina kan Senado.
Tinawan niya nin duon na pirmahan asin notaryado na an naunambitan na dokumento.
